SikhDiary

ਪਟਿਆਲਾ: ਪਟਿਆਲਾ ਦੇ ਸਰਸ ਮੇਲੇ ਵਿੱਚ ਬੀਤੇ ਦਿਨ ਉਸ ਸਮੇਂ ਹਫੜਾ-ਦਫੜੀ ਮਚ ਗਈ ਜਦੋਂ ਇੱਕ ਵੱਡਾ ਝੂਲਾ ਲਗਭਗ 70-80 ਫੁੱਟ ਦੀ ਉਚਾਈ ‘ਤੇ ਜਾਮ ਹੋ ਗਿਆ। ਇਸ ਝੂਲੇ ਵਿੱਚ ਇੱਕ ਦਰਜਨ ਤੋਂ ਵੱਧ ਬੱਚੇ ਫਸ ਗਏ, ਜਿਸ ਨਾਲ ਮੇਲੇ ਵਿੱਚ ਹਫੜਾ-ਦਫੜੀ ਮਚ ਗਈ। ਬੱਚਿਆਂ ਦੇ ਮਾਪੇ ਰੋਣ-ਪਿੱਟਣ ਲੱਗ ਪਏ।ਅਚਾਨਕ ਹੜਕੰਪ ਮੱਚਣ ਨਾਲ ਮੇਲੇ ਦਾ ਮਾਹੌਲ ਵਿਗੜ ਗਿਆ , ਜਿਸ ਕਾਰਨ ਜ਼ਿਲ੍ਹਾ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਦਖਲ ਦੇਣਾ ਪਿਆ। ਏ.ਡੀ.ਸੀ. ਵਿਕਾਸ ਦਮਨਜੀਤ ਮਾਨ ਦੀ ਅਗਵਾਈ ਵਾਲੀ ਇੱਕ ਟੀਮ ਨੇ ਬੱਚਿਆਂ ਨੂੰ ਇੱਕ-ਇੱਕ ਕਰਕੇ ਹੇਠਾਂ ਉਤਾਰਿਆ ਅਤੇ ਉਨ੍ਹਾਂ ਨੂੰ ਮਾਪਿਆਂ ਦੇ ਹਵਾਲੇ ਕਰ ਦਿੱਤਾ। ਦਿਨ ਭਰ, ਇਸ ਗੱਲ ‘ਤੇ ਚਰਚਾ ਹੁੰਦੀ ਰਹੀ ਕਿ ਝੂਲਿਆਂ ਦੀ ਜਾਂਚ ਕਿਉਂ ਨਹੀਂ ਕੀਤੀ ਗਈ, ਉਹ ਕਿੱਥੋਂ ਆਏ ਸਨ, ਅਤੇ ਉਨ੍ਹਾਂ ਨੂੰ ਕੌਣ ਚਲਾ ਰਿਹਾ ਸੀ। ਲੋਕ ਪਹਿਲਾਂ ਹੀ ਇਸ ਗੱਲ ਤੋਂ ਨਰਾਜ਼ ਸਨ ਕਿ ਝੂਲਿਆਂ ਦੇ ਲਈ ਬਹੁਤ ਜ਼ਿਆਦਾ ਪੈਸਾ ਵਸੂਲਿਆਂ ਜਾ ਰਿਹਾ ਹੈ। ਕਿਉਂਕਿ ਇਹ ਇੱਕ ਸਰਕਾਰੀ ਮੇਲਾ ਹੈ, ਇਸ ਲਈ ਹਰ ਚੀਜ਼ ਲਈ ਨਿਰਧਾਰਤ ਦਰਾਂ ਹੋਣੀਆਂ ਚਾਹੀਦੀਆਂ ਹਨ, ਪਰ ਇੱਥੇ ਅਜਿਹਾ ਕੋਈ ਪ੍ਰਬੰਧ ਸਪੱਸ਼ਟ ਨਜ਼ਰ ਨਹੀਂ ਆਇਆ ।ਲੋਕਾਂ ਨੇ ਕਿਹਾ ਕਿ ਲਗਭਗ ਇੱਕ ਘੰਟੇ ਵਿੱਚ ਇੱਕ ਦਰਜਨ ਬੱਚਿਆਂ ਨੂੰ ਹੇਠਾਂ ਉਤਾਰਿਆ ਗਿਆ। ਰੱਬ ਦਾ ਸ਼ੁਕਰ ਹੈ, ਸਾਰੇ ਬੱਚਿਆਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਅਤੇ ਉਨ੍ਹਾਂ ਦੇ ਮਾਪਿਆਂ ਕੋਲ ਵਾਪਸ ਭੇਜ ਦਿੱਤਾ ਗਿਆ। ਇੱਕ ਵੱਡਾ ਹਾਦਸਾ ਕਦੇ ਨਾ ਭੁੱਲਣ ਵਾਲਾ ਦੁਖਾਂਤ ਹੋ ਸਕਦਾ ਸੀ, ਪਰ ਇਸ ਲਾਪਰਵਾਹੀ ਨੂੰ ਮਾਫ਼ ਨਹੀਂ ਕੀਤਾ ਜਾਣਾ ਚਾਹੀਦਾ। ਲੋਕਾਂ ਦਾ ਕਹਿਣਾ ਹੈ ਕਿ ਅਜਿਹੇ ਝੂਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਹੋਣੀ ਚਾਹੀਦੀ ਹੈ।