ਪੇਟ ਦਰਦ ਤੋਂ ਪੀੜਤ ਸੀ ਵਿਅਕਤੀ, ਜਾਂਚ ਦੌਰਾਨ ਅਜਿਹੀ ਚੀਜ਼ ਮਿਲੀ, ਡਾਕਟਰ ਵੀ ਹੈਰਾਨ

ਮੋਗਾ : ਮੋਗਾ ਜ਼ਿਲ੍ਹੇ (Moga district) ਦੇ ਪਿੰਡ ਰੋਡੇ ਵਿੱਚ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ 40 ਸਾਲ ਦੇ ਵਿਅਕਤੀ ਦਾ 3 ਘੰਟੇ ਦਾ ਆਪ੍ਰੇਸ਼ਨ ਕੀਤਾ ਗਿਆ ਅਤੇ ਉਸ ਦੇ ਪੇਟ ਵਿੱਚੋਂ ਕਈ ਤਰ੍ਹਾਂ ਦੇ ਨਟ, ਬੋਲਟ, ਈਅਰ ਫੋਨ, ਰੱਖੜੀ, ਵਾਸ਼ਰ ਅਤੇ ਛੋਟੇ ਪੇਚ ਕੱਢੇ ਗਏ।ਜਾਣਕਾਰੀ ਅਨੁਸਾਰ ਕੁਲਦੀਪ ਸਿੰਘ (40) ਨੂੰ ਅਚਾਨਕ ਪੇਟ ਵਿਚ ਦਰਦ ਅਤੇ ਬੁਖਾਰ ਵੀ ਸੀ, ਜਿਸ ਕਾਰਨ ਉਸ ਨੂੰ ਮੋਗਾ ਦੇ ਸਥਾਨਕ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਕਈ ਦਿਨਾਂ ਤੋਂ ਦਰਦ ਨਾਲ ਤੜਫ ਰਿਹਾ ਸੀ ਅਤੇ ਉਲਟੀਆਂ ਨਹੀਂ ਰੁਕ ਰਹੀਆਂ ਸਨ। ਜਦੋਂ ਉਹ ਹਸਪਤਾਲ ਪਹੁੰਚਿਆ ਤਾਂ ਡਾਕਟਰ ਨੇ ਉਸ ਦੇ ਪੇਟ ਦਾ ਐਕਸਰੇ ਅਤੇ ਸੀ.ਟੀ ਸਕੈਨ ਕੀਤਾ। ਇਸ ਦੌਰਾਨ ਉਸ ਦੇ ਪੇਟ ‘ਚ ਨਟ, ਬੋਲਟ, ਪੇਚ, ਰੱਖੜੀ, ਲਾਕੇਟ, ਈਅਰਫੋਨ ਅਤੇ ਚੁੰਬਕ ਦੇਖੇ ਗਏ।ਹਸਪਤਾਲ ‘ਚ 3 ਘੰਟੇ ਤੱਕ ਵਿਅਕਤੀ ਦਾ ਆਪਰੇਸ਼ਨ ਕੀਤਾ ਗਿਆ ਅਤੇ ਉਸ ਦਾ ਸਾਰਾ ਸਮਾਨ ਬਾਹਰ ਕੱਢ ਲਿਆ ਗਿਆ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਇਹ ਪਹਿਲਾ ਮਾਮਲਾ ਹੈ ਜੋ ਉਨ੍ਹਾਂ ਦੇ ਸਾਹਮਣੇ ਆਇਆ ਹੈ। ਫਿਲਹਾਲ ਮਰੀਜ਼ ਕੁਲਦੀਪ ਸਿੰਘ ਦੀ ਹਾਲਤ ਠੀਕ ਨਹੀਂ ਹੈ ਅਤੇ ਉਸ ਨੂੰ ਆਈ.ਸੀ.ਯੂ ਵਿੱਚ ਵੈਂਟੀਲੇਟਰ ‘ਤੇ ਰੱਖਿਆ ਗਿਆ ਹੈ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਉਸ ਨੂੰ ਬਚਾਉਣ ਦੀ ਹਰ ਸੰਭਵ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।